Ä Gschicht vo Endi u Afang

 

D’ Adelbodner Bärga si i Chuerächt iitilt. Jedä Bärg bsitzt nämlig so viel Chuerächt, wie är Vieh dr Summer dür mag nährä. D’ Beständ vam Vieh vo dä Buurä si vo Summer zu Summer unterschidlig u no vor em Gang z’ Bärg unvertiilt. Genau um die rästligä Chuärächt wird am Fritig ar Bärgrächnig gfeilscht.

Drbi isch d Bärgrächnig, also dr Adelbodner Früehligsmärit, viel meh als numä ä Zämäkunft u Verhandlig vo dä Landwirtä. D Bärgrächnig setzt däm trischtä Ortsbild vor Zwüschäsaison äs Endi u eröffnet d’ Summersaison im Lohnerdorf.

Isch Bärgrächnig, herrscht im Schwand bis spat id Nacht äs munters Tribä, ä enormä Kontrascht wemä mit dä vorhärigä stillä Wuchi verglicht. Sie huucht Adelbodä umhi Läbä ii u let näd numä Chinderhärz höjer la schla. D’Bärgrächnig versetzt ds ganza Dorf inä usglasseni Stimmig, alls git a däm Tag ä chli ringer, jeda isch äs Bitzi entspannter. Ma trifft sig zum Zmittag, zum Ziveri ufnä no warma Berliner vam Houeter, idä Büro u Gschäft schmeckts nach brenntä Mandli u Nidläfäfeni u spetischtens nam Fyrabä gseht sig ganz Adelbodä bim Gempeler Fritz.

Dr Afang vom Summer söll gfyret wärdä, will ds Endi chunnt ganz gwüss u scho viel ds gli umi, Bärgrächnig isch am Fritig, 3. Brachet!

0 Kommentare

Dein Kommentar

An Diskussion beteiligen?
Hinterlasse uns Deinen Kommentar!

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.